Uppskriftir »

Lopapeysa

 

Stærðir:   

XS     S      M      L     XL                           Peysumynstur

88     96    102  112   120

Efni:Icelandic sweater

Þingborgarlopi og Þingborgarband.

500-500-550-600-650 g lopi í aðallit.

50 g lopi eða band af tveimur litum í mynstur

Einnig má bæta við lituðu bandi í mynstur ef vill.

Ef notaður er lopi frá Ístex verður að gæta að prjónafestu, ekki er sami grófleiki á honum og á Þingborgarlopanum.

Sokkaprjónar nr 3.5 og 5

Hringprjónar nr 3.5  40 og 80 cm langir

Hringprjónar  nr 5, 40, 60 og 80 cm langir

Á opinni peysu þarf einnig:

Heklunál nr. 3.5.

Rennilás eða 7-8 tölur.

Prjónafesta:

14 l og 22 umf  í sléttu prjóni = 10 x 10 cm

Önnur prjónastærð getur hentað, allt eftir því hvort prjónað er fast eða laust, finnið það út með því að prjóna prufu.

Prjónað er úr plötulopanum tvöföldum. Bolur og ermar eru prjónuð í hring, á opinni peysu eru prjónaðar 2 aukalykkjur upp alla peysuna, fitjaðar upp að loknu stroffi að neðan.

Bolur:

Fitjið upp 124-136-144-156-168 l á 80 sm hringprjón nr 3.5, prj stroff í hring 6-8 sm  2 sl og 2 br. Ef peysan á að vera opin eru stroffið prjónað fram og til baka.  Skipt yfir á 80 sm hringprjón nr. 5, tengt saman í hring á opinni peysu. Á opinni peysu eru fitjaðar upp 2 aukalykkjur í upphafi umf sem eru prj brugðnar upp í hálsmál. Prjónað sl uns bolur mælist 38-44 sm. (Lengd á bol er smekksatriði, mælið og metið sídd.)

Á dömupeysu er fallegt að gera ,,mitti“ á peysuna með því að taka úr á bol. Setjið  merki í báðar hliðar, takið úr 2 l hvoru megin, *prj 2 l saman, prj 1 l, prj 2 l saman*.  Fyrst er tekið úr er bolur mælist 8-12 sm og síðan 2x aftur með 5 sm á milli. Alls eru teknar úr 12 l. Prj 5 sm, þá er aukið út aftur samsvarandi og með sama millibili og tekið var úr og endað með sama lykkjufjölda. Mælið og metið hvað bolur á að vera síður og hvar þið viljið að úrtaka byrji.

Ermar:

Fitjið upp 32-32-36-36-40 l á sokkap. nr. 3.5, prjónið stroff í hring 6-8 sm. Skiptið yfir á sokkap.  nr. 5 þegar stroffi er lokið og aukið strax um 2 l undir miðri ermi, (1 l eftir fyrstu lykkju og 1 lykkju fyrir síðustu l í umf).  Endurtakið aukningu 7-7-8-9-9 x upp ermi, með u.þ.b. 8 umf á milli,  þar til 48-48-54-56-60 l eru á prjóninum. Skiptið yfir á stutta hringprjóninn nr. 5 á u.þ.b. miðri ermi. Gott er að nota prjónamerki til að merkja þar sem aukið er út. Prjónið uns ermi mælist 44-52 sm. (Mælið handlegg og metið hve ermin á að vera löng)

Axlastykki:

Sameinið nú bol og ermar á langa hringprjóninn nr 5. Setjið 5-5-5-5-6- síðustu l og 5-5-5-6-6- fyrstu l á báðum ermum á prjónanælu. Setjið 10-10-10-11-12 af bol á prjónanælu þar sem umferð byrjar vinstra megin á bol. Prjónið  fyrri ermina við  bolinn 38-38-44-45-48 l, prjónið næstu 52-58-62-67-72 l af bol og setjið næstu 10-10-10-11-12 l á hjálparprjón. Prjónið seinni ermina við og gerið eins og með hana. Prjónið síðan 52-58-62-67-72 l af bol, þá eru 180-192-212-224-240 l á prjóninum.  Áður en mynstur er prjónað, fækkið um  2 l í st M og L áður en byrjað er á mynstri, => 180-192-210-222-240 l á prjóninum.  Prj mynstur eftir teikningu. Notið styttri hringprjóna eftir því sem lykkjum fækkar. Þegar mynstri lýkur er tekið úr aukalega þar til u.þ.b. 64-70 l eru eftir á prjóninum, þá er skipt á 40 cm hringprjón nr 3.5 og prj 6-8  sm stroff og 4 umf slétt prjón, fellt af. Gangið vel frá öllum endum og lykkjið saman undir höndum.

Axlastykki á opinni peysu:

Prj 26-29-31-33-36 l af bol að framan, umf byrjar næst við brugðnu l,  setjið 10-10-10-11-12  næstu l á prjónanælu og prj fyrri ermina við 38-38-44-45-48 l og svo 52-58-62-68-72 l á bol, setjið næstu 10-10-10-11-12  l af bol á prjónanælu og gerið eins með hina ermina og að síðustu 26-29-31-33-36 l af bol. Þá eiga að vera á prjóninum 180-192-212-224-240 l. Í st XS og S þarf að auka um 3 l áður en byrjað er á mynstri, í st M þarf að auka út 1 l, í st L þarf að bæta við 1 l og í st XL þarf að bæta við 3 l, til að mynstur gangi upp.  Þá eru 183-195-213-225-243 l á prjóninum. Prj mynstur eftir teikningu. Notið styttri hringprjóna eftir því sem lykkjum fækkar. Þegar mynstri lýkur er tekið úr aukalega þar til u.þ.b. 64-72 l eru eftir á prjóninum. Fellið af aukal 2 sem prj voru brugðnar upp.  Þá er skipt á 40 cm hringprjón nr 3.5 og prj fram og til baka 6-8 sm stroff og 4 umf slétt prjón. Fellið af. Gangið vel frá öllum endum og lykkjið saman undir höndum.

Listar:

Saumið í vél með beinu þéttu spori og samlitum tvinna í brugðningu að framan sitt hvoru megin, sem næst slétta prjóninu. Gott er að sauma tvisvar hvoru megin. Klippið upp á milli saumanna. Snúið réttunni á peysunni að ykkur og notið heklunálina til að taka upp lykkjur í hneppulista þvert á prjónið. Krækið í bandið með heklunálinni í gegnum lykkjurnar, en sleppið alltaf fjórðu hverri umferð, það er ágætis þumalputtaregla, þá er listinn passlega langur. Færið lykkjurnar jafnóðum yfir á hringprjón nr 3.5 80 sm langan. Látið listann ekki ná upp í slétta prjónið í hálsmáli. Prjónið stroff  2-3 umf ef það á að setja rennilás en 5-6 umf. ef setja á tölur og gerið þá hnappagöt með jöfnu millibili á annan boðunginn. Passið að affellingin sé mátulega strekkt.  Til að fela sárið innan á eftir saumaskapinn, er gott að hekla eina umf. af fastahekli yfir það og varpa því svo niður með einföldu spori.

Ef settur er rennilás er mælt fyrir honum eftir þvott og hafður 2-3 sm styttri en boðungurinn mælist. Þræðið hann á og passið að mynstur standist á. Ef hann er saumaður á í saumavél er gott að sauma hann í sömu átt beggja megin og byrja þar sem mynstur byrjar og sauma að hálsmáli og eins þegar saumað er niður. Með þessari aðferð gengur betur að láta mynstur stemma en ef saumað væri sitt í hvora áttina.

Þvottur:

Þvoið flíkina í volgu vatni með góðri ullarsápu eða sjampói. Skolið vel og vindið svo í hálfa mínútu í þvottavél. Mikilvægt er að vélin fari strax að vinda, (þær eru misjafnar að þessu leyti) en sé ekki að veltast með flíkina fyrst, þá getur hún þófnað. Leggið peysuna á handklæði til þerris.

 

Comments are closed.